Alla Itolae Nusa 17
Kena Abrame eni musuna butu sikwa lesini sikware, TUHANE IaselukeNi lokoi kai Ibeteke be, “Aure, Alla rebe Auku kbasare ela titinai. Lene lokoKu rame kai ono lulu Auku sukare rame.
Au taluke misete kaimu kai Au ono amu anubuaru esi boka titinai.”
Abrame itatu lope tapele, eleki Alla Ibeteke lokoi be,
“Au taluke misete kai ale elere: Namake amu anubuaru esi lei kena bangsa bokala.
Ele mere hoko amu nane Abrame moneka po Abrahame, le Au teu ale kena ntuane mena ete bangsa bokala.
Au ono amu anubuaru esi nebu boka titinai, kai Au onosi ono bangsa totoini kai kamalaru esi rulu bei ale.
Au teu lepate ete Au kai ale kai amu anubuaru eti pela. Leke Au ono Alla etemu kai ete amu anubuaru.
Tapele meije, rebe arue kenae lupe tamata maka luake beluke, Au riluke ete ale kai ete amu anubuaru. Hoko pusue tape Kanane eleue ale kai amu anubuaru eti pela, kai Au ono Alla etesi.”
Alla Ibeteke loko Abrahame lekwe be, “Ale kai amu anubu mokwaiaru suke pusumi supu sunate. Au teu lepate meije suke alene loko rame kai amu anubuaru esi lene loko rame bei anubu kena anubu.
[tolong lihat ayat sebelumnya]
Hoko sunate ale leke eono tanda ete Au kai ale be Au teu lepate kai ale.
Hoko kwetele rebe eni petua kwalu pende suke sunateni. Rebe suke sunateise, pusue mokwai rebe esi rue kaimu kai tamata makerika rebe ruelesi me amu lumare kai tamata rebe sabeise, rebe esi rulu bei ale more. Mere bei anubu kena anubu.
Tamata rebe ruelesi me amu lumare kai tamata rebe asabesi kena kepene suke sunatesi. Le mere eono tanda rebe selue be Au taluke misete kai ale mere eti pela.
Hoko tamata mokwai rebe sunateni more, ile mere Auku tamata moneka le ilene loko Au taluke misete rame mo.”
Eleki Alla Ibeteke loko Abrahame lekwe be, “Akotie amu bina kena Sarai yanoma le bei petu meije eni nane Sara peneka.
Au riluke misete etei kai Au ono iruele kwete mokwai etemu. Kai Au ono Sara iono inate ete bangsa bokala kai namake kamalaru esi rulu beini.”
Eleki Abrahame itatu lope tapele po imali kai ilepa me lalei be mokwai rebe eni musuna utane esa pende eni kwetele saisa mone piseo? Kai Sara eni musuna butu sikwa peneka hoko iruele kwetela saisa mone piseo?
Eleki Abrahame ibeteke loko Alla be, “Mise lesi Ismaele ikbasae auku taneiaru noma.”
Po Alla Iombe, “Mo, namake amu bina Sara Iruele kwete mokwai eleki aono eni nane Isake. Au taluke misete ete kwetele mere eono etei kai eni anubuaru eti pela.
Kai ete Ismaele lekwe, Au lene akotie bei Aure, hoko Au riluke misete etei leke eni anubuaru esi boka. Kamala butu esa lesini lua esi rulu beini, kai eni anubuaru Au onosi kena bangsa elake.
Po Au taluke misete Au onoe kuru kai Isake, amu anae rebe tatike pine Sara iruelei kena musune suike kena olase elemeije neka.”
Kena Ilepa pela kai Abrahame peneka, eleki Ikeu beini ne.
Eleki kena petu mere neka Abrahame ikoti eni nanae Ismaele kai pusue tamata mokwai rebe esi me eni lumare, kai rebe ruelesi me eni lumare, kai rebe isabeise eleki isunatesi lulu Alla Eni lepate eteije.
Abrahame isupu sunate eni musuna butu sikwa lesini sikwa.
Yo eni nanae Ismaele isupu sunate eni musuna butu esa lesini telu.
Esi sunate sakesa kena petu mere neka,
sakesa kai pusue tamata mokwaia me eni luma, rebe ruelesi me eni lumare kai sie rebe isabeise.